നിദാനം

ഇല്ലായ്മ മാത്രമേ ഉണ്ടായിരുന്നുള്ളു..
ഉണ്ടാവുക എന്ന സങ്കൽപ്പം തന്നെ
അങ്ങിനെയാണ് ഉണ്ടായത്.

ഉണ്ടാവലിനൊപ്പം ഇല്ലായ്മയും
ഉണ്ടായതിനാൽ
ശൂന്യതയിൽ മൗനമുണ്ടായി.
മൗനത്തിൽ വചനം സങ്കല്പിക്കെ
വാചാലതയുടെ സൂക്ഷ്മ തലത്തിൽ
ഒരു ത്രികാല വിസ്ഫോടനം.

സത്യത്തോളം ചെറുതായതിനാലും
സങ്കൽപ്പത്തോളം വലുതായതിനാലും
സമയം എന്ന സംശയമുണ്ടായി.

ഊർജ്ജം ഉറക്കമുണർന്നപ്പോൾ
പദാർത്ഥം യാഥാർത്ഥ്യമായി.
പ്രകാശം കണ്ണുതുറന്നപ്പോൾ
പ്രപഞ്ചവും ചരാചരങ്ങളും.

ഉണ്ടാവുക എന്ന സങ്കൽപ്പത്തിനും
ഇല്ലാതാവുക എന്ന
യാഥാർഥ്യത്തിനും കാരണത്തെ
സത്യത്തേക്കാൾ ചെറുതാണെന്ന്
ശാസ്ത്രം പറയുന്നതിന്റെ കാരണം
സങ്കൽപ്പത്തേക്കാൾ
വലുതായത്‌ കൊണ്ടായിരിക്കും!!